പ്രഭയാണവിടെത്തുടരും കനകം വിളയും
പ്രണയച്ചിരിയുടെ മുകളില്‍ തെളിയും
കവിതപ്പുഴപോലൊഴുകിപ്പടരും
പശിയില്‍തളരുന്നുദരം തിരയും
അശനത്തുണയായരികത്തണയും
വരയില്‍ തെളിയുന്നഴകായുലകില്‍
നിറമേറിവരും ചരിതം വിരിയും
ദുരിതക്കടലില്‍ വലയും മനുജര്‍
കരകണ്ടുണരും കനിവായ്മരുവും
നിശയില്‍ കരുതല്‍ മിഴിയായ് വിടരും
ഗതിയേകാനൊരു കരമേറിവരും
തളരും തനുവില്‍ കുളിരായ് പടരും
അഴലിന്‍ വഴിയില്‍ തണലേകി വരും
അപരസ്വരവും ഗീതകമാവും
അവനെത്തഴുകും ശാന്തി നിറയ്ക്കും
അറിവിന്നുറവത്തെളിയില്‍ വിളയും
കനിയായ് മധുരം അലിവായലിയും
വിരസത്തറയില്‍ പിരിശം പകരും
തളിരായിലകള്‍ ഹരിതം സരളം
നെറുകില്‍ തടവും വിരലില്‍ ചൊരിയും
കരുണത്താളം കരളും കവരും
സ്നേഹം സ്‌നേഹമതാവണമുണ്മ
വാക്കും നോക്കും കാവലുമാവാന്‍...
© ഷാഫിക്കവിതകള്‍
6 Comments
നല്ല വരികളാണ്. നന്നായി കവിതകളെഴുതുന്ന വ്യക്തിയാണ്. രണ്ടുവർഷം മുമ്പ് ഞങ്ങളൊരുമിച്ച് കുറെ മത്സരങ്ങളിൽ പങ്കെടുത്തിട്ടുണ്ട്. സമയക്കുറവുമൂലം ഗ്രൂപ്പ് വിട്ടതോടെ പിന്നീട് കണ്ടിട്ടില്ല. ഇപ്പോൾ കണ്ടതിൽ സന്തോഷം. ആശംസകൾ പ്രിയനേ.
ReplyDeleteനന്നായിരിക്കുന്നു വാക്കും നോക്കും കാവലാകുന്ന സ്നേഹം എഴുത്തായി പടരട്ടെ ആശംസകൾ
ReplyDeleteതളിരായിലകൾ ഹരിതം സരളം .എന്തൊരു ശബ്ദഭംഗി
ReplyDelete💕💕
ReplyDeleteKeep it up!
ReplyDeleteമനോഹരം
ReplyDelete