ആര്‍ഷഭാരതം / വിനോദ് ശ്രീധര്‍ ആനയറ

കവിത (വൃത്തം - രഥോദ്ധത)

 ആത്മബോധമറിവായി ജ്വലിച്ചിടും
മാമുനി പ്രവരരേകിയായിരം
ജ്ഞാനശാഖയതിനൂര്‍ജ്ജമേറ്റിടും
ആര്‍ഷഭൂമിയതിലാണ്ട സംസ്കൃതീ
ദേവതാഗണമതുണ്ടു കോടിയാം
സൂര്യനും ഭ്രമണ ഗോളജാലവും
കാനനം, അരുവി, കല്ലു, നാഗവും
ആര്‍ഷഭൂവിലതി പൂജ്യ ദേവരായ്
ഈശ്വരാംശമതു കണ്ടിടും സദാ

സര്‍വ്വജീവ-ജഡ ജാലമേതിലും
പൂജ്യയായ് ജനനി ഭൂമിദേവിയും
ആര്‍ഷ ഭൂവിനിതു ദിവ്യ ദര്‍ശനം
വൈരികള്‍ പ്രഹരമേകിയെങ്കിലും

പൂര്‍ണ്ണനാശമതു സാധ്യമാകൊലാ
കാരണം മഹിത ഭൂവിനാശ്രയം
ആര്‍ഷഭൂമിയുടെ ഞാന വൈഭവം
ഭാരതം ഗരിമയോടെ നിന്നിടാന്‍
ലോകമൊട്ടു ഗുരുവായി വാഴ്ത്തിടാന്‍
ആത്മബോധമതുണര്‍ത്തി നേടിടാം

ആര്‍ഷഭൂമിയുടെ ദിവ്യചേതന.

വിനോദ് ശ്രീധർ ആനയറ

--------©vinodsreedhar-anayara-------