പരിണാമം | ഖൈറു

സെറ്റ് ചെയ്തു വെച്ച മണിമുഴക്കം
രണ്ടാമതും ഉണര്‍ത്തുമ്പോള്‍
അവകാശിയായി  പൊതിഞ്ഞുവച്ച
സ്‌നേഹത്തില്‍ നിന്നും അവള്‍  ഊര്‍ന്നിറങ്ങും

ഇന്ന് മുഴുവന്‍ കയറിയിറങ്ങേണ്ട
തീവണ്ടി മുറികളെക്കുറിച്ചാലോചിച്ച് 
ഇത്തിരി നേരം  അസ്വസ്ഥയാകും

തീരുമാനിച്ചുറപ്പിച്ച രസമുകുളങ്ങളെ
മുളച്ചു വരുന്ന  ചിന്തകള്‍ക്കൊപ്പം  പുഴുങ്ങിയെടുക്കും

വീടിനെ അലക്കി വെളുപ്പിച്ച് അഴക്കോലിലിടുമ്പോള്‍ 
നനഞ്ഞു പോയ  കനവുകളെയും ഉണക്കാനിടും

അപ്പോഴേക്കും
സ്‌കൂളില്‍ ദേശീയ ഗാനം തുടങ്ങിയിരിക്കും
ഫോണെടുത്ത് ക്ലാസില്‍ കയറുമ്പോഴാകും
അടുത്ത ചുമതലയ്ക്കായുള്ള 
കാഹളം മുഴങ്ങുന്നത് കേള്‍ക്കാനാവുക

കീ കൊടുക്കാതെ തന്നെ കൈ കൊട്ടുന്ന പാവയാണു താനെന്ന് 
അപ്പോള്‍ മുതലാണ് അവള്‍ക്കു തോന്നിത്തുടങ്ങിയത്

നിര്‍ത്താതെ പാടുന്ന പാട്ടില്‍
മോദവും ശോകവുമുണ്ടാകും
അപ്പോഴും വീട്ടിലെ ആവശ്യങ്ങള്‍ പലതും
അഴയില്‍ത്തന്നെ തൂങ്ങിക്കിടപ്പുണ്ടാകും

മുറികള്‍തോറും മുഴങ്ങുന്ന ഭാഷാ വിഷയ വൈവിധ്യത്താല്‍ വീടൊരു സര്‍വ്വകലാശാലയായി പരിണമിക്കും

തിരക്കിട്ട മനോവ്യാപാരങ്ങളൊക്കെത്തന്നെ
തന്റെ ജീവല്‍സ്പന്ദനമാണെന്ന് അവള്‍ തിരിച്ചറിഞ്ഞിട്ടുണ്ട്..
ആനന്ദത്തിന്റെ ചെറു കിരണങ്ങള്‍ 

 അവളില്‍  പലപ്പോഴും  മിന്നിമറിയുന്നത് നിങ്ങള്‍ക്ക് കാണാനാകു.

-----------

©KAH