ഒരു പേരിലെന്തിരിക്കുന്നു ? >>>ആദര്‍ശ് മാധവന്‍കുട്ടി

സ്ത്രീ പ്രണയം ഉപേക്ഷിക്കുന്നത് 

ഒരു നാട് 

അതിന്റെ പേരുപേക്ഷിക്കുന്നത് പോലെയാണ്.

ഓര്‍മയുടെ ഉത്ഖനനങ്ങളില്‍ 

ഭൂതകാലത്തിന്റെ മുനയുള്ള അവശിഷ്ടങ്ങള്‍ 

തികട്ടിവന്നുകൊണ്ടേയിരിക്കും.

ഋതുക്കള്‍ മാറി വന്നാലും 

അവനുമൊത്തുള്ള സ്വപ്നാടനങ്ങള്‍

അവളുടെ ഉറക്കത്തെയസ്വസ്ഥമാക്കും.

പണ്ടെങ്ങോ നാട് വിട്ടുപോയി , 

തിരിച്ചു വന്നവനെ

പുതിയ ദേശപ്പേര് നോവിക്കുമ്പോലെ 

വീട്ടിലും പൂന്തോട്ടത്തിലും

അവന്റെ സര്‍പ്പസാന്നിധ്യമുണ്ടാവും

ഏതുസമയവും കരിനീലിച്ചേക്കാവുന്ന ചുംബനമുറിവുകളെ

അവള്‍ മറ(യ്)ക്കേണ്ടി വരും

പേരുപേക്ഷിച്ച നാട്

ദേശാടനപ്പക്ഷികളെയെന്നപോലെ

സ്വന്തം പ്രണയം അവളെ

തിരിച്ചുവിളിച്ചുകൊണ്ടേയിരിക്കും.

--------------------------------------------------------

© ആദര്‍ശ് മാധവന്‍കുട്ടി