പറഞ്ഞറിയിക്കാനാവാത്ത
വിരസത
പെണ്ണിനെ അറിഞ്ഞിരിക്കാനും
അറിയാതിരിക്കാനും
ഒറ്റപ്പെടണം .
സന്തോഷകരമായ പ്രണയത്തിനോടോ
വെറുപ്പിനോടോ ഉള്ള
അഭിനിവേശത്തിലാണ് ഞാന്‍ .
കഠിനമായ ദിനങ്ങള്‍ കടന്നുപോകുന്നു .
അനന്തതയുടെ അതിരുകളില്‍
ഒരിക്കലുമവസാനിക്കാത്ത
വളയാത്ത വഴികള്‍.
വിശാലമായ ഇടങ്ങള്‍ തുറന്നുതന്ന
പേരിടാത്ത സ്വര്‍ഗ്ഗത്തിലേക്ക്
വഴുതിവീഴുന്ന ചിന്തകള്‍ .
ബുദ്ധിശൂന്യമായി അലറുകയും
ആകാശത്തേക്ക് നോക്കി
സൂര്യനെ തെറിപറയാനും തോന്നി .
കല്ലുകള്‍കൊണ്ടു സൂര്യനെ എറിഞ്ഞു
ചന്ദ്രനെ എറിഞ്ഞു .
എന്നിട്ടും കലിയടങ്ങാതെ
അവളെ ബന്ധിതയാക്കി
ഭയപ്പെടുത്തി .
ഭയചകിതമായ അവളുടെ കണ്ണുകളിലേക്കു നോക്കി
ചിറകുകള്‍ മുളയ്ക്കുന്ന
അവളുടെ ചെവികളില്‍
കേള്‍വിയുടെ പ്രതിധ്വനി എന്താണെന്ന്,
വ്യാപ്തി എന്താണെന്ന്
അവള്‍ മനസ്സിലാക്കിയപ്പോളും
അവളുടെ ഹൃദയം
എന്റെ കൈകളില്‍ പിടയ്ക്കുകയായിരുന്നു.
അവളുടെ വളര്‍ന്നു വലുതായ ചെവികളില്‍
അവള്‍ക്കൊരിക്കലുമറിയാത്ത ഭാഷ-
യുരുവിടുമ്പോഴേക്കുമവള്‍
അനന്തതയിലേക്കൂളിയിട്ടിരുന്നു ,
എങ്കിലുമവളുടെ ഹൃദയം
എന്റെ കയ്യില്‍ തുടിക്കുന്നുണ്ടായിരുന്നു.
---------------------------------------------------------------
© Valluvanadan
0 Comments