പ്രണയം വറ്റുമ്പോൾ | ഗ്രീഷ്മ ബേബി

പ്രണയം വറ്റുമ്പോൾ

നമുക്കിടയിൽ

ഒരു വൻകര രൂപപ്പെടും

മറുകരകളിലിരുന്നു നാം 

പിടഞ്ഞു ചത്ത മീനുകളെ

നോക്കി പരിതപിക്കും

നിലച്ച തോണിയൊന്നിൽ

അവസാന വറ്റും

തിന്നുതീർത്ത ബലികാക്കകളുടെ

കാറിച്ചകൾ കേൾക്കാം

കാർമേഘങ്ങളാൽ ആകാശം

ഇരുണ്ടുകുത്തുമെങ്കിലും

വഴിമാറി വീശിയ കാറ്റടിച്ച്

മഴ മാറി പെയ്യും

ദാഹിച്ചു വലഞ്ഞ

ചുണ്ടുകളുള്ള

പറവകൾ മറുകരയിൽ നിന്നും

ഇക്കരെ പാറിനടക്കും

കറുത്ത റോസാ പുഷ്പങ്ങളുള്ള

ചെടിയുടെ മുള്ളുകൊണ്ട്

പൊടിഞ്ഞ രക്തത്തുള്ളികൾ

അവിടിവിടെയായി കാണും

കൂട്ടിലടയ്ക്കപ്പെട്ട

പ്രണയപറവകൾ

ആകാശത്തേക്കു പറന്നകലും

നിറം മങ്ങിയ

ചിത്രശലഭങ്ങൾ

വഴി മറന്നു

നവ പുഷ്പങ്ങൾ തേടിയലയും

പ്രണയം വറ്റുമ്പോൾ...

നമുക്കിടയിൽ

ഒരു വൻ കര രൂപപ്പെടും

നിന്നിൽ നിന്നും

എന്നിലേക്കുള്ള ദൂരം

ഇന്ന്

വിദൂരം...

---------©greeshma baby--------