ദൈവരാജ്യം | കവിത | ഷാഫി മുഹമ്മദ് റാവുത്തര്‍

വിശക്കുന്ന രാജ്യം

വിയര്‍ക്കാത്ത ദൈവം

വിതുമ്പുന്ന മര്‍ത്യന്നിതാ

ക്ഷേത്രഹര്‍മ്യം

സ്തുതിക്കുന്നു ശ്ലോകം

വെറുക്കുന്നു തമ്മില്‍ 

ഒരേ ദൈവതത്താല്‍ 

ചിരം വൈരമായോര്‍!

രഥം പാഞ്ഞു,യുദ്ധം

ഹനിച്ചെത്ര ജീവന്‍

അധോചിന്തമാത്രം 

ജയിക്കുന്നു വീണ്ടും

ദിനേയഞ്ചുനേരം 

നിലം കുമ്പിടുന്നോര്‍-

ക്കരുള്‍ ബാങ്കു 

നാദം പരത്തും മിനാരം

തകര്‍ത്തങ്ങുതീര്‍ത്തി

ട്ടടിക്കല്ലുതോണ്ടി-

ക്കളഞ്ഞിട്ടു ദൈവം

സ്വരൂപത്തിലാളാന്‍!

അസത്യപ്പെരുക്ക-

ങ്ങളൊട്ടേറെനീര്‍ത്തി

ഇരുട്ടില്‍ വെറുപ്പി-

ന്നിരുള്‍ ധൂമകര്‍മ്മം

മദച്ചൂരിനൂറ്റം മുഴക്കുന്ന

കൂട്ടര്‍ക്കിതാ-

ണൊറ്റരുന്നം 

മതത്തിന്റെ നേട്ടം

പരപ്രേമസൂക്തം

പൊഴിക്കുന്ന വേദം

മൊഴിഞ്ഞിട്ടുയിര്‍

ചീന്തിയേറ്റുന്നു ഭക്തി

ഒഴുക്കുന്ന ചോരയ്ക്കിര,

നൂറു ജീവന്‍

തിളങ്ങുന്ന വാളാല്‍

ജയിക്കുന്ന ദേവാ

അനീതിയ്ക്കുമീതേ 

കരിങ്കല്ലടുക്കി

നിനക്കായിരിക്കാ-

നിടം വെട്ടി നേടി

പച്ചയ്ക്കരിഞ്ഞിട്ടു

കത്തിച്ചെറിഞ്ഞും

കബന്ധങ്ങളേറെ-

ത്തുലാഭാരനേദ്യം

ഉടവാളിനറ്റത്തു-

ടല്‍ച്ഛേദമേറി

നിണധാരയേറ്റം 

നിറവോടൊഴുക്കി

ശവക്കച്ചപോലും

കരയുന്ന കാലം

ഒരേ സോദരങ്ങള്‍

നയിക്കുന്നു യുദ്ധം

മതപ്പാടു തീണ്ടാത്തവര്‍ 

നീളെ നാളില്‍

പുണര്‍ന്നങ്ങു നില്പൂ

മനുഷ്യത്വമോടെ

പശിക്കാലമാറ്റാ-

നിരുള്‍തൂത്തകറ്റാ-

നൊടുങ്ങാപ്രയത്നം 

നടത്തുന്നനിസ്വര്‍

അരക്കെട്ടുവിറ്റി-

ട്ടശിക്കാനൊരുക്കാന്‍

മുഴുക്കാമവമ്പിന്‍ 

നുകം തേടുമമ്മ

ചെരുപ്പിന്റെ വാറില്‍ 

തിളക്കംപെരുക്കി-

ക്കിടയ്ക്കുന്നതുട്ടിന്ന-

ടുപ്പൊന്നെരിക്കാം

കുതിയ്ക്കുന്ന റിക്ഷ,-

ച്ചവിട്ടിക്കിതയ്ക്കും

കറങ്ങുന്ന ചക്രം 

നിലയ്ക്കാതെ പായും

ധനം തിന്നു നിത്യം

വിസര്‍ജ്ജിച്ചു കൂട്ടും

ധനാഢ്യര്‍ക്കുനോട്ടം

ഷെയര്‍ രേഖയേറ്റം

പണത്തിന്‍ പുരങ്ങള്‍

ക്ഷയിക്കാതിരിക്കാന്‍

വണങ്ങുന്ന മൂര്‍ത്തി-

യ്ക്കിരക്കുന്നു തോട്ടി!

അമേധ്യക്കയങ്ങള്‍

നിറഞ്ഞാലവര്‍തന്‍

സമാധാനമാകും 

വിശപ്പെന്ന സത്യം!

പെരും ചേരിയോരത്തിണ 

ചേര്‍ന്നു മോഹം

കൊരുക്കുന്നൊരിന്ത്യന്‍ 

ദരിദ്രന്റെ തേട്ടം

അടുത്തൊന്നുനേരം

പുലരുന്ന നേര-

ത്തുദരം കരയാ-

തിരിക്കാനുപായം

വിശപ്പിന്നുമുന്നില്‍

മതം ക്ഷിപ്രശൂന്യം

അരിച്ചാക്കു തന്നെ

ദരിദ്രന്റെ ദൈവം...