നിര്‍മല പ്രേമം © സിമി കെ.എസ്.

നമ്മുടെ പ്രേമം നാമെന്ന ലോകത്തിന്നപ്പുറം
അജ്ഞാതമായിരിക്കട്ടെ
 ഒഴുകുമതിനിടയിലൊരു
 മേഖലയിലെവിടെയോ
കണ്ടുമുട്ടി അപരിചിതരായി നാം 
ആത്മാവിനുള്ളിലെ പരിചിതമാ 
നാളങ്ങള്‍ ചുംബിച്ചുകൊണ്ടൊരുമിച്ചു
 തിളങ്ങി .
നാം തമ്മില്‍ കണ്ടതാദ്യമായെങ്കിലും 
ആത്മാവുകള്‍തന്‍ സംഗമവേളയിലന്നൊരു 
 പ്രണയനക്ഷത്രം
 ഗര്‍ഭത്തിലുരുവായതും പിന്നെ 
പലവഴിയൊഴുകാന്‍ വിധിച്ചവര്‍ നമ്മളാ
പച്ചിലനിഴലുകള്‍വിട്ട് സംവത്സരങ്ങള്‍ താണ്ടി 
നിന്റെയുമെന്റെയും ഗര്‍ഭത്തിലാത്താരകം
ഇന്ദ്രിയങ്ങള്‍ക്കപ്പുറമന്ധമാം രാവിന്റെ 
വിജനമാമാകാശവീഥിയിലിന്നും
 ജനനത്തിനായി കാത്തിരിക്കുന്നു.