നഷ്ടസ്വപ്നങ്ങള്‍ • ശഫീഖ് അബ്ദുല്ല പരപ്പനങ്ങാടി

ആളിക്കത്തിയിട്ടും 
അപ്രതീക്ഷിതമായി 
അണഞ്ഞു പോയത്,

അസാധ്യമെന്ന്
അകമേ വിധിയെഴുതി 
ആത്മാഹുതി ചെയ്തത്,

കാലമേറിയപ്പോള്‍  
കാലനോടൊപ്പം 
കണ്‍മറയത്തേക്കകന്നത്,

ചിതയിലെരിഞ്ഞ് 
ചാരമാവും മുമ്പേ 
ചിതലു തിന്നത്,

തളിരിട്ട് വന്നപ്പോളേക്കുമാരോ 
തല്ലിക്കൊഴിച്ചതില്‍പ്പിന്നെ 
തളിര്‍ക്കാന്‍ മറന്നത്,

നെടുവീര്‍പ്പിട്ടിരിപ്പുണ്ട്,
നോവു ബാക്കിയാക്കിയിനിയും ചില 
നഷ്ടസ്വപ്നങ്ങള്‍... 
----------------------------------------------------------------------------

ശഫീഖ് അബ്ദുല്ല

മലപ്പുറം ജില്ലയിലെ പരപ്പനങ്ങാടി സ്വദേശി. ചില ആനുകാലികങ്ങളിലും ഒട്ടേറെ ഓണ്‍ലൈന്‍/ഡിജിറ്റല്‍ മാഗസിനുകളിലും രചനകള്‍ വെളിച്ചം കണ്ടിട്ടുണ്ട്. മൂന്ന് കവിതാസമാഹാരങ്ങളില്‍ ഭാഗമായിട്ടുണ്ട്.