വേലിച്ചെടികള്‍ ചുവക്കുമ്പോള്‍ | സിന്ധുമോള്‍ തോമസ്

ഓരോ ശിശിരത്തിലും 
അവന്‍ വേലിച്ചെടികളെപ്പോലെ 
ഇലവരെ ചുവക്കും 

ആകാശംപോലെ നീലയില്‍ മുങ്ങും 

വെള്ളിമേഘക്കൂട്ടം പോലെ തിളങ്ങും 

ശീതക്കാറ്റു പോലെ കൂടെക്കൂടെ വന്നു നോക്കും 

സൂര്യവെളിച്ചം പോലെ സ്വര്‍ണ്ണനിറം പെയ്യും 

ഞാന്‍ തോറ്റുപോയവള്‍ ;
നിന്നെ 
കൈക്കുമ്പിളില്‍ കോരിനിറയ്ക്കുന്നതില്‍ കണ്ടുതീര്‍ക്കുന്നതില്‍
കേട്ടു മതിവരുന്നതില്‍ 
പ്രണയിച്ചുന്മാദിയാകുന്നതില്‍.

വൈകിപ്പോയി;
രണ്ടു വന്‍കരകളിരുന്നു നാം   
ഗ്രീഷ്മ ദാഹങ്ങളെ കുടിച്ചുവറ്റിക്കുന്നു,
കൊഴിഞ്ഞയിലകളെ ഓര്‍മകളെയെന്നപോല്‍ നെഞ്ചിലേറ്റുന്നു, 
ശിശിരമുണ്ണുന്നു,
വസന്തം കൊരുക്കുന്നു.

-------------©sindhumol-thomas-----------------