മുറിവ് | സി.എം.വിനയചന്ദ്രന്‍

ഉറക്കമുണര്‍ന്നു നോക്കിയപ്പോള്‍ 

നെറ്റിയില്‍ ഒരു മുറിവ് . 

 സ്വപ്നത്തില്‍ പറ്റിയതാവാം.. 

ചോരയുടെ നനവ് ഇനിയും മാഞ്ഞിട്ടില്ല. 

എന്തായിരുന്നു സ്വപ്നമെന്നോ, 

ആരായിരുന്നു മുറിവേല്‍പ്പിച്ചതെന്നോ 

ഓര്‍ത്തെടുക്കാനേ കഴിയുന്നില്ല. 

കണ്ണിനും കണ്ണാടിക്കും കാണാവുന്നിടത്തു 

തന്നെയായിപ്പോയി മുറിവ് . 

കാണുന്നവരോടൊക്കെ 

ഉത്തരം പറഞ്ഞ് പറഞ്ഞു മടുത്തു. 

സ്വപ്നത്തില്‍ കിട്ടിയതാണെന്ന് 

ആരോടും പറഞ്ഞില്ല. 

ആളുകളെന്തു വിചാരിക്കും... 

ഇപ്പോള്‍ അടുത്ത സ്വപ്നത്തിനായുള്ള 

കാത്തിരിപ്പിലാണ്. 

മുറിവുണക്കുന്ന, മായ്ക്കുന്ന 

ആരെങ്കിലും വരുമെന്ന പ്രതീക്ഷയില്‍ ..! 

C.M.Vinayachandran

E-Delam ID No: ED001

•